Nunduk Manggarai: Renggerai Eros - Nerapost

(Sumber gambar: santpol.org)

Oleh: Bung Donttel (Admin Nerapost)

One ca beo mese manga ca keluarga ata dia keta. Mose dise te manga pande beti nai agu hae ata. Ise kole tuka ngengga agu mese bebek agu ata hae. Le dia pande agu wintuk, lawa ca beo teti hia ema Polus kudut jadi tu’a beo. Ome manga lewang tau data one ca beo hitu,  ema’d polus ata caca mbolot. Keluarga ema Polus te manga pande bentang agu begas agu hae ata. Lawa ca beo hormat da’at keluarga dise.

Ema Polus manga telu mantar. Mantar ata ngaso ne SD kelas 3. Te suan kelas satu agu mantar ata susu, hitu de umur pat ntaung. Setiap leso ema Polus toing agu titong anak. “Nana ite ata lengge. Mose dite dedia agu hae ata. Riko-riko ba weki”.

Ca leso ema Polus agu wina siro lata beo bana. Ema Polus imbi lata kudut torok penti one boe hitu. Mai hia bantang agu wina kudu ngo one beo hitu. “Weta co ite ge, lako de ko?. Mai tae de wina “Lako ket ta nara. Ise poli imbi ite kudut ba tudak hitu”. Mai tae de ema Polus “Co roeng dite so’o, dades ko?”. Mai kole tae de wina “Asi ket nara, kong ket pedeng ce mbaru de”.

Le wien ema Polus pikir, co keta caran rantang ndai lise. Wie hitu ema Polus kawe cara kong ise neka ndai. Nuk, le ema polus manga gola malang si rangkung api. Com areng ket le hitu diang. Pikir kole le liha bo mantar sua so’o ngance aring de. Tapi co keta hia hot susu. Aring keta le pai gi. Cait hia deket data keta agu aku.

 

(Baca juga: Berpastoral hingga Tuntas: Ziarah Pelayanan Dua Katekis di Tuwa Paroki Datak - Nerapost)

 

Pas le gula, reme inung kopi ise one dapur. Mai hia ema Polus benta mantar so’o. Mantar sua liha soak mole. Ho ata susu liha ga, kapu paka dia’a. “Nana e, asi ndai ema agu ende to’ong e. Ami ngo sina ho’o, ngo weli kacang. Gereng ce mbaru ket hi nana”. Mantar ata susu’n  ngegur sai “Toe ngoeng aku ema. Aku ca tong”. Hema hia ema Polus. kawe cara apa kole ga, kong asi ndain hia.

Nihu one meseng hia ema polus mang poka betong. Mai hia coco betong so’o kudut jadi gogong. Telu gogong ata pande diha. Sua gogong latang mantar ata sulung agu te suan. Pas gogong latang mantar ata susu, ema Polus pande nua le tidek wa main ritin.

Poli pande gogong hitu hia. Benta mantar koen ne “Nana, ngo teku wae meu ta”. Ata susu ho’o semangat keta. Ai kudut anging le tiwu mese to’ong. Ata telu so’o tipa agu gogong ngo teku wae jera de ema’d. Kae ata sua bae lise tara jera ngo teku wae le emad. Toe ngaok kae so’o. Lako ket. Mai pesan de emad latang kae ata sua so’o “Nana e, nais koe meu to’ong le wae e. Olong cebong sampe puas keta, hitu po teku wae”. Ngetuk kae sua so’o.

Lako ise ngo teku wae. Ema polus agu winan sibuk siap-siap ngo sina beo hot siro ise. Le wae kid mantar so’o hia agu winan lako ngo one beo hitu. Labar wae ata susu ho’o sampe puas. Sampe hia hemong bao tae de eman.

 

(Baca juga: Menabung Rindu || Cerpen Stefan Raharjo)

 

Poli cebong, mai tae de kaen “Ase, teku wae de ge.” Poli taung teku de kae sua so’o. ata susu ho’o toe tara penong gogong diha. Mai ten ga “Co tara te ruhu penong daku ne ta”. Mai tae de kae hot suan “pene taung lhau gogong hitu e”. Hitu kali penen le ase ho’o, toe king ruhu peno. Cumpang ase ho’o, lego wa gogong ho’o. Ase ho’o cebo tida kae sua so’o. Kae sua so’o bao ga, lako pado ise. Toe manga gereng lise ase susu ho’o.

Retang ngahol ase ho’o one pinggir tiwu hitu. Ai poli legong le kaen tamba kole gogong diha toe tara penong. Retang diha sampe rares bokak. Idik de ase ho’o “Oeeeee ema, co tara legong lise aku e. Ende hanang koe ket aku”. Retang diha sampe nderes leso.

Sina mai tiwu mese hitu manga ca langke mese. Eta lobon langke ho’o manga mbaru de renggerai. Lelo le renggerai ho’o, anak koe ata retang kin. Lelap renggerai ho’o eta mai sai’i de anak koe ho’o. Mai tae de renggerai ho’o “ata so’o tara retang hau ta.” Mai wale de anak koe ho’o “Legong lise aku.” Mai kole tae de renggerai “Cei hitu legong hau”. mai kole walen “Kae-kae daku ta.”

 

(Baca juga: Content Creator, Servin Indra Meraup Puluhan Juta Per Bulan - Nerapost)

 

Momang le renggerai ho’o mai hia canga anak koe ho’o ba eta somong langke. Ba eta mbaru diha. Hitu keta kin retang anak koe ho’o. Mai tae de renggerai ho’o “Emo retang ge. Jaga mai poti to’ong”. Denge tae poti anak koe ho’o gelang-gelang koso lu’u ne.

Kae sua so’o nge gereng kin one mbaru. Kae ata ngaso gelang-gelang ngo batu one tiwu hitu. Toe manga itan ase ho’o. Bo gogong ne ga, nge na’a kin eta mai watu. Hitu kali benta liha toe kin manga walen ase ho’o. Retang kole kae ho’o nitu. Retang ngahol keta. “Co keta lako baro one ise ema ta ase. Ngo nia keta hau bao e”.

One nai de kae ho’o, am delep keta daku ase bao ga. Hia lako loleng wae laun.  Nge ba kin mempos api ne. Lako hia one loleng wae laun, toe manga itan ase ho’o. “Ole ase, mamur keta daku nai ta. Sala dami bao ge.” Hitu kali pidik diha one loleng wae hitu laun. Teo keng itan ase ho’o.

 

(Baca juga: Ganda Dia; Kali Ata Manga Rona - Nerapost)

 

Wie hitu kae ho’o toko one lupi wae hot teku dise bao leso. Mesen sala ata pande de kae ho’o latang ase ne. Mai hia idik agu morin “ Mori, co tara toe ala aku ket ite.” Toe sadar le kae ho’o kakor lalong ga. “Gelang koe gulan tana, kong sunu wa tiwu aku kawen hau e ase”.  Gula tana, kae ho’o loak taung baju agu deko ne, lako one tiu laun. Sunu taung liha one roang mese. Tapi toe kin manga itan ase ho’o.

Ase ho’o nge toko lemot kin wa mai lebe de renggerai. Wie hitu renggerai ngo kawe muku agu pau kudut hang de anak koe ho’o. Gelang-gelang kae ho’o ngo baro one lawa ca beo. Baro liha, ase susu diha melut le tiwu mese. Mai lawa ca beo ba nggong agu gendang. Pikir dise am wendo le darat. One beo hitu  manga ca ata mbeko dia. Mai tae data mbeko ho’o “Toe manga tanda-tanda wendo le poti ne ta, kawe dia’a ket le meu le tiwu hitu. Le hitu kin anak hitu”.

Hitu ket denge le ema Polus agu winan, gelang-gelang ise kole mbaru. Cai one mbaru ise ganti ket baju. Poli hitu buru-buru ngo le tiwu hitu. Nihu baon ata do le tiwu hitu. Retang ema Polus agu wina. Nanang ongga liha mantar ata ngaso ho’o. Gelang-gelang ata pungkut ema Polus. “Toe keta manga molor liput ase hau e. Com mata hau ta”, kenta de ema Polus latang mantra ata ngaso ne.

 

(Baca juga: Surat Latang hi Enu)

 

Nihu baon, renggerai ho’o lelo ise. le dia’a nain renggerai ho’o agu momang agu anak koe ho’o.  Mai renggerai ho’o canga anak ho’o, agu lelap ata mai ise. Ciek taung ata ita renggerai mese ho’o. Mai renggerai ho’o wau’u anak ho one bereha lawa do. Gelang-gelang ema Polus ngo rao anak ho’o. Retang taung ata lawa do ita kejadian hitu. mai ema Polus jera ata ngo ala manuk lalong mese, kudut teing renggerai ro’o. poli teing manuk, renggerai ho’o lelap kole ngo eta mbarun.

“Anak adalah mutiara berharga yang dititipkan Tuhan. Jadi, cintailah mereka sebagaimana Tuhan mencintai anda. ”

Tulisan ini pernah dimuat di Letangmedia.com